Kraftur, stuðningsfélag fyrir ungt fólk með krabbamein og aðstandendur, hefur nú ráðið Sólveigu Ásu B. Tryggvadóttur sem framkvæmdastjóra félagsins, en hún tók við starfinu 1. apríl 2025. Sólveig Ása kemur inn með fjölbreytta reynslu og djúpan skilning á málefnum félagsins.
Sólveig Ása hefur sex ára reynslu sem framkvæmdastjóri AFS á Íslandi, þar sem hún stóð fyrir stefnumótun og víðtækri uppbyggingu samtakanna. Hún er með Executive MBA-gráðu frá Háskólanum í Reykjavík. Þekking Sólveigar Ásu á starfsemi félagasamtaka eins og Krafts er ekki einungis fagleg – hún hefur einnig persónulega reynslu af baráttu við krabbamein.
„Þessi reynsla hefur gefið mér einstaka innsýn í það hversu mikilvægur Kraftur er fyrir ungt fólk og aðstandendur. Ég hlakka til að leggja mitt af mörkum til að styrkja starf félagsins og tryggja áframhaldandi velgengni þess,“ segir Sóveig Ása.
Sem framkvæmdastjóri mun Sólveig Ása bera ábyrgð á daglegum rekstri Krafts, stefnumótun, fjárhagsstjórn og hagsmunagæslu fyrir félagsmenn. Hennar markmið er að styrkja innra starf, auka sýnileika samtakanna og efla tengslanet svo Kraftur geti veitt enn öflugri þjónustu.
Stjórn Krafts fagnar komu Sólveigar Ásu og hlakkar til samstarfsins.
