Stór áfangi er nú í höfn eftir að Willum Þór Þórsson, heilbrigðisráðherra undirritaði reglugerð þess efnis að skimun fyrir krabbameinum í brjóstum verði gjaldfrjáls eða því sem næst. Gjaldið fer úr rúmum 6.000 krónum í 500 krónur. Breytingarnar voru kynntar á blaðamannafundi í Brjóstamiðstöð Landspítalans við Eiríksgötu í þann 10. október. Um er að ræða lið í heildarendurskoðun á greiðsluþátttöku.
Lækkun komugjalds er talið mikilvægt skref í að auka þátttöku í brjóstaskimun, sem hefur ekki verið nógu góð síðustu ár, en viðunandi mæting er skilyrði fyrir árangri.
Um 200 konur greinast árlega með brjóstakrabbamein og um 50 látast úr sjúkdómnum. Skimun er besta leiðin til að greina mein snemma en með skimun er hægt að greina mein á frumstigi og auka þannig lífslíkur. Íslensk gögn sýna að krabbamein sem greinast í skimun eru ólíklegri til að hafa komið aftur fimm árum síðar, en ef þau koma aftur eru þau almennt á vægara stigi og því viðráðanlegri. Af því má í stuttu máli draga þá ályktun að bæði lífshorfur og lífsgæði kvenna sem greinast með brjóstakrabbamein í skimun geti verið betri en þegar meinin greinast út frá einkennum.
“Þetta eru sannkölluð tímamót fyrir konur í landinu og í raun landsmenn alla. Krabbameinsfélagið hefur til margra ára barist fyrir því að brjóstaskimun væri gjaldfrjáls til að auka þátttöku kvenna og gera skimun aðgengilegri fyrir alla samfélagshópa óháð efnahag. Það var því sannarleg gleðistund þegar Willum heilbrigðisráðherra tilkynnti að brjóstaskimun myndi verða allt að gjaldfrjáls. Vonandi verður það til þess að konur mæti í skimun og lífslíkur þeirra kvenna sem greinast aukist”, segir Hulda Hjálmarsdóttir, framkvæmdastjóri Krafts.
